تجديد الأي توني (I-20)

في الأي توني موجود موعد الدراسة، وسبب تجديدي للأي توني I-20 لتفادي مشاكل المطار والدخول لأمريكا، وتجديد الاي توني معناها تجديد حتى معلومات موعد الدراسة.

علشان كذا رسلت ايميل للجامعة وتأخرو عن الرد وغثيتهم بأيميل ثاني لحتى ماردو علي وأرسلوها لي على مكتب الشحن، لكن الخطأ أني ماجددت الاي توني مباشرة بعد ماكنسلت من مايو وقررت على أغسطس..!!

الخطأ أني كنت مروق ومبرد، ولما حجزت موعد السفر على تاريخ 18 أغسطس بعدها جددت الأي توني، والقديم كان فيه الدراسة تبدأ تاريخ 24 مايو والحظور 24 مايو أما الاي توني الجديد الدراسة تبدأ 23 أغسطس والحضور لازم قبل باسبوع في 16 أغسطس.. واعتليت وقلت لخويي شوف الوضع واستفسر، اذا مصرين على حضوري تاريخ 16 فالحل الوحيد اني أغير موعد الرحلة. لكن لما استفسر خويي قالت له مو اجباري  بس أفضل له وأسهل له يقدم مع دفعة الطلاب اللي بيدخلون، والحمدلله كنت حاجز على الخطوط القطرية وفيها ميزة امكانية التغير مجاناً مرة وحدة.

جددت الأي توني قبل بشهر من موعد الدراسة، يعني لو في راسي تغيير أقدر أغير، بس ماراح أغير إذا الأمور مو إلزامية.

الشي الثاني أن راسلت السفارة وقلت لهم جددت الاي توني هل في شي أسويه، وردو علي بعد 4 أيام تقريباً وقالو اذا رقم السيفس الموجود على الاي توني نفسه القديم فالوضع أوكي، أما إذا لا فأصدر فيزا جديدة.

الفائدة من الموضوع لازم تجديد الاي توني في حالة تغيير موعد الدراسة، والتأكد من تطابق نفس رقم السيفس، وأيضاً مراعاة الحجز للتذاكر بما يناسب الاي توني، مو مثلي لما حجزت سويت تجديد للاي توني وطلعت التواريخ مو متناسبة مع بعضها، (الحجز على 18 والاي توني مكتوب فيه الحظور على 16).

*ملاحظة: الخطوة هاذي بعد خطوة الحجز للطيران بالنسبة للتاريخ والحدث اللي صار لي، لكن حطيتها قبل موضوع الحجز علشان التنظيم  المفترض والتصنيف في الموقع.