الوصول إلى واشنطن

الحمدلله وصلت بعد رحلة استغرقت 16 ساعة وبالتحديد 14 ساعة من الدوحة إلى واشنطن.

أول ماوصلنا ضلينا يمكن ساعة في الطابور بس ماحسينا بالوقت لأن صادفنا واحد سعودي وسولفنا وطار الوقت وماحسينا .. المهم وصلت وكل مامر واحد ووقع جوازه دخل يمين ويتوكل على الله الا انا قالي روح يسار .. وكان تختبص علومي وقلت مادري ويش سويت أنا .. يالله سترك ..😦

اشوي الا اشوف سعودي ثاني جاني في في نفس القاعة اللي أنا فيها واللي بعدو واللي بعدو وخويي وراهم بعد .. وتجمعو الشعب السعودي أطمنيت أني مو مشبوه🙂

قالو انتظرو واللي يسمع اسمه يجي .. وعن نفسي ضليت حدود ساعتين أو أكثر بعد .. وبالموت جاني الأسم .. وكنت متخوف من ان يخلعوني ملابسي ولا يسون فيني شي .. خخ لكن الحمدلله عدت على خير .. مشيت ومشيت ومشيت الا اشوف ناس يستقبلون ناس وقلت لخويي خلاص خلصنا من العلة .. قالي خلاص انت دخلت مافي لا تفتيش ولا شي .. ماصدقت في البداية من الوسواس لأن ضلينا في المطار يمكن 4 ساعات بدون مبالغة.

وصلنا 3 العصر بتوقيت واشنطن وماطلعنا الا تقريبا 6 ونص .. وفي ملاحظة .. في نموذجين في الطيارة لو ماعطوك قبل الرحلة بساعة تأكد وأستفسر عنهم .. لابد تعبيهم علشان مايأخرونك في المطار ويسون زحمة معاك.. وهالشي أكد علي خويي اللي في امريكا قبل السفر.. قالي هم بيعطونك لكن من باب الحيطة أسأل عن النماذج.. وبالفعل قبل الوصول بنصف ساعة تقريباً .. الخطوط القطرية وزعو علينا النماذج.

الحمدلله .. أكتب لكم الحدث وأنا الأن في أمريكا .. !!


12 thoughts on “الوصول إلى واشنطن

    1. كل الركاب يعطونهم النموذج وهم بالطيارة قبل النزول لأمريكا. ماعدا حاملين الجنسية الأمريكية. ولو صارت مشكلة بالنموذج، يمدي التعديل في المطار لكن مايستحسن تأجيل تعبئة النموذج إلى وقت الوصول للمطار. الأفضل قبل الهبوط والوصول يكون جاهز.

  1. لو سمحت اخي الكريم ، عندي استفسار بخصوص التفتيش. هل صحيح يتم تفتيش اللابتوت والجوال للبحث عن اي اغاني او افلام تم تنزيلها بشكل غير قانوني ؟ شكرا لك

      1. شكرا لك ، طيب في اي مشكلة لو في صور عائلية ؟ هل في امكانية انه ينسخوا الصور او الملفات ولا لا؟

      2. الصور العائلية مافيها مشكلة.
        ماينسخو الصور. مجرد تفتيش.
        لو في صور خاصة وتحتاج الى تحفظ، انصح ترفعينها على درايفرات في النت مثل دروب بوكس

      3. لا ولله مجرد صور بدون حجاب للاهل والاصدقاء، سمعت انه لهم الحق في تفتيش الهاردسك كمان، صحيح؟

  2. وعليكم السلام ورحمة الله وبركاته

    هلا بيك أخوي وليد .. طبعاً إجراءاتي بسيطة جداً .. كتبت ورقة استقالة بيوم الاستقالة قبل باسبوعين.

    طبعا هي المفروض قبل بشهر .. علشان كذا انا ضغطت على الفورمن وقلت له خلص اوراقي ولله الحمد خلال اسبوع سويت اجماع ميتنق مع الفورمن والسوبر انتندنت

    بعدها رحت العضيلية البيرسونيل وخلصت اوراقي اللي لي واللي علي وكل حاجة وسويت وكالة لأبوي من المحكمة علشان الوالد يقدر يكمل الاجراءات عني بالوكالة اللي عنده. وبسس

    طبعاً حاولت اخذ إجازة ماقدرت .. حاولت اغير تخصص وأحول على الحاسب وماقدرت في النهاية قدمت استقالة وخروج نهائي من الشركة.

    وأي استفسار انا حاضر أخوي

  3. السلام عليكم و رحمة الله

    الحمد لله على السلامة اخوي صالح

    انا عندي استفسار اذا تسمح لي

    انا موظف في الشركة السعودية للكهرباء تقريبا نفس حالتك حلمي اكمل دراستي حاسب الي انا متردد جدا من الفصل من الشركة

    انا حاب اعرف ايش كانت اجراءاتك مع ارامكو؟ هل فصلت او اخذت اجازة ايش كان تصرفك؟

    شاكر و مقدر تعاونكك و متابع لك…

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s