الحصول على أمر إركاب

بعد الروقان وفيزتي في جوازي .. قلت خلني أطقطق عند الوزارة يمكن يحالفني الحظ وأحصل على أمر إركاب .. رحت الرياض صارت لي سالفة طويلة عريضة كرهت نفسي فيها ورجعت بدون فايدة.

رحت لمقر وزارة التعليم العالي من الساعة 8 الصباح، وضليت هناك وأول موظف استقبال جا حدود الساعة 9 ونص (موظفين حكومة  🙂 )، قلت له إذا أبغى أمر إركاب كيف وشلون، قالي شتبي ..!! قلت له ياعمي أنا ابروح امريكا وادرس .. قالي روح لمبنى الوزارة الخاص ببرنامج خادم الحرمين الشريفين، ولما رحت لهم حسيت فيها حووووسة من جد.

طبعاً أنا رحت من باب ضربة الحظ يعني ماني رايح بالغصب أحصل أمر الإركاب، والشي الثاني اللي خلاني أروح أني سمعت أن في واحد من الشباب استقال من العمل (ماعرفه شخصياً صراحة) بس اخذت رقمه وكلمته وعرفني، وقلت له افدني ياخوي لو في شي يمين ولا يسار ممكن يفيدني، قال أنا راسلت وسويت ومقابلة وكيت وكيت، وأثناء كلامه قال لي على سالفة أمر الاركاب، قلت له ويش اللي يخليك تسوي زحمة واتروح الرياض ولمدة خمسة ايام تروح وتجي الوزارة وتقدم أوراقك، أربعة أيام كل يوم ينرفض بس اليوم الخامس حالفه الحظ، قلت له روح ياعمي طق لك تذكرة  3000 ولا 4000 ريال وريح حالك، قالي مو هامتني التذكرة، اللي همني مابعد التذكرة..!! قلت له وشنهو اللي بعد التذكرة؟ قالي: لما تدخل أوراقك راح تدخل معلوماتك عندهم في السستم، وبيكون أسرع وأولوية في الإلحاق بالبعثة.

أنا صراحة بحثت في الموضوع، وحسيت فيها لف ودوران وواسطات ومادري شنهو وحاجة شايعة كثيرة في المنتديات وغيره لكن ما فيها حاجة رسمية تثبت هالشي ولا من واقع تجارب، ناس راحت معاها امر اركاب التحقو بسرعة وناس ثانية أخذو أمر أركاب وتأخرو حالهم من حال اللي ما أخذ أمر إركاب.

بصراحة ماقدر أنكر هالشي لكن في نفس الوقت ماعندي الشي اللي يثبتها، وعن نفسي هالخطوة تخطيتها، وهي تعتبر خطوة مو إجبارية بل إضافية للسفر والدراسة، لكن سمعت عنه كثير أن الحصول عليه مهم ويساعد في الالحاق بسرعة، والله أعلم.